Atzerriko ibilgailu bat matrikulatzea

Hainbat arrazoi daude ibilgailu bat inportatu nahi izateko, esaterako, prezioa hobea izatea edo egoitza aldatu behar izatea. Espainiako legeriaren arabera, ibilgailu bat Espainian bizi diren pertsonen edo egoitza fiskala Espainian duten erakundeen erabilerarako denean, Espainiako matrikula izan behar du. Zein da beharrezko dokumentazioa? Zeintzuk dira egin beharreko izapideak?

Atzerriko ibilgailu bat matrikulatzeko egin behar duzun lehen gauza da IAT gune batera jotzea Ibilgailuen Azterketa Teknikoa egiteko, kotxeak edo motorrak duela gutxi azterketa hori jatorrizko herrialdean gainditu badu ere. IATa egiteko behar duzun dokumentazioa desberdina izango da kasuaren arabera, ibilgailu berria edo jada matrikulatutakoa izatearen arabera, eta ibilgailuaren jatorrizko herrialdea EBaren barne egotearen edo ez egotearen arabera.

Jarraian azalduko dizugu zein dokumentazio behar duzun IATa egiteko EB barneko jatorrizko herrialde batean jada matrikulatutako ibilgailu bat Espainian matrikulatu aurretik. Kasu horretan, hau behar izaten da gehienetan:
  • Jatorrizko herrialdeko zirkulazio baimena edo dokumentu baliokidea.
  • Fitxa teknikoaren jatorrizko dokumentua, ibilgailuaren azterketa teknikoko txartela izena ere hartzen duena, edo jatorrizko herrialdeko dokumentu baliokidea.
  • Ibilgailuak CE motako homologazioa badu, haren fitxa murriztua beharko da, edo CE (CoC) adostasun ziurtagiria, bertan ziurtatzen baita kotxeak Europar Batasunak eskatzen dituen kalitate eta ingurumen baldintzak betetzen dituela.
Homologazio europarreko pasahitzik ez baduzu, gomendatzen dizugu, IATra etorri aurretik, gure guneetako edozeinetara hurbiltzea edo gurekin telefonoz harremanetan jartzea behar duzun dokumentazioa ezagutzeko. Hartara, aurretiaz ziurtatuko duzu zure ibilgailuak, berezitasunen bat dela eta, bestelako dokumenturik behar ez izatea.

Dokumentu hauek aurkezteko, izapidea egin nahi duzun gunearekin harremanetan jarri beharko zara, izan ere, izapide hauek ez dira aldizkako IAT azterketa baterako hitzorduaren parekoak. Guneen telefonoak webguneko atal honetan aurkituko dituzu: https://www.itv-tuvrheinland.es/eu/sare-of-estazio-itv.

Behin dokumentuak aurkeztuta eta dagozkion tarifa eta tasak ordainduta, eguna eta ordua emango dizkizugu ibilgailua IAT gunera ekartzeko, azterketa teknikoa egin ahal izateko. Azterketa gainditu ondoren, IAT guneak ibilgailuaren fitxa teknikoa prestatuko du ibilgailua Espainian matrikulatu ahal izateko.

Hurrengo urratsa da aplikagarriak diren zergak ordaintzea. Horretarako, Ogasun bulegora jo beharko duzu eta 576 inprimakia eskatu bertan. Inprimaki horren bitartez ordaindu ahalko duzu Zenbait Garraiobideren gaineko Zerga Berezia. Kotxea berria bada, Ogasun Ministerioaren delegazioan bertan, aprobetxatu aukera 300 edo 309 inprimakia ere aurkezteko, BEZaren ordainketa egiaztatze aldera. Bigarren eskukoa bada eta partikular bati erosi badiozu, BEZa ordaindu beharrean, Ondare Eskualdaketen gaineko Zerga ordaindu beharko duzu; enpresa bati erosi badiozu, horrez gain, enpresa horren Europako Erkidegoko IFK argi adierazten duen faktura ere aurkeztu beharko duzu.

Gogoratu Zirkulazioaren gaineko Zerga erroldatuta zauden Udalean ordaindu beharko duzula.

Izapide hauek amaituta, Trafikoko Zuzendaritza Nagusiko Probintziako Burutzara jo ahalko duzu beharrezko dokumentu guztiekin (ibilgailuaren dokumentazioa, IAT txartela eta zergak ordaindu izanaren agiriak). DGTra joan aurretik, ez ahaztu ibilgailua matrikulatzeko eskaera ofiziala inprimatzeaz, bertan ordaindu beharko duzun tasa baita.

Orain, egiteke duzun gauza bakarra izango da matrikularako plakak erostea ordezko piezen denda batean eta aseguru bat kontratatzea.